Komuna e Haraçinës ka shpallur thirrjen publike për formimin e Këshillit Rinor Lokal (KRL), një trup këshilldhënës që do të përfaqësojë interesat e të rinjve dhe do të kontribuojë në zhvillimin e politikave rinore në nivel lokal.
Këshilli Rinor Lokal synon të krijojë një platformë të qëndrueshme për përfshirjen aktive të të rinjve në vendimmarrje, duke adresuar nevojat dhe idetë e tyre për përmirësimin e jetës rinore në komunë.
Të drejtë aplikimi kanë të gjithë të rinjtë e moshës 15 deri në 29 vjeç që jetojnë në Komunën e Haraçinës, përfshirë përfaqësues të organizatave rinore, forumeve rinore politike, këshillave të nxënësve dhe studentëve, si dhe të rinj aktivistë që nuk janë pjesë e ndonjë organizate.
Kriteret kryesore për aplikim janë banimi në komunë, mosha e përcaktuar dhe vullneti për të kontribuar në politikat rinore lokale.
Dokumentet e nevojshme për aplikim përfshijnë formularin e aplikimit, letër motivimi, CV, kopje të dokumentit të identifikimit si dhe letër nominimi për përfaqësuesit e organizatave.
Afati i fundit për aplikim është 15 qershor 2026, ora 15:00, ndërsa aplikimet dorëzohen në arkivin e Komunës së Haraçinës.
Përzgjedhja e anëtarëve do të bëhet nga një komision vlerësues, duke respektuar parimet e barazisë gjinore dhe përfaqësimit të drejtë të të rinjve.
Me këtë iniciativë, Komuna e Haraçinës synon fuqizimin e zërit të rinisë dhe përfshirjen e tyre aktive në proceset vendimmarrëse lokale.
Burimi: alfax.mk
