Në emisionin “Pastel” ka qenë mysafir hoxhë Qenan Ismaili, kryetar i Myftinisë së Shkupit.
Foli për rëndësinë e agjërimit dhe rolin e familjes në muajin e Ramazanit.
I pyetur se a ka pësuar ndryshime muaji i shenjtë islamik, Ismaili tha se Ramazani nuk ka qenë siç ka qenë në të kaluarën.
Kujtoi se iftaret – vakti i mbrëmjes ku përfundon agjërimi i ditës për të filluar në syfyr, janë një moment i afrimit të familjarëve, por që në të kaluarën janë organizuar më ndryshe.
“Si fëmijë kur kam qenë, e mbaj mend se ne për iftare nuk kemi bërë ftesa, as nuk na ka ftuar askush. E mbaj mend, axha dhe daja im kur vinin në iftar, vinin të paftuar sepse e dinin se tryeza, sofra është e hapur për të gjithë. E mbaj mend si sot, me vete e merrnin një bukë që mos ta ngushtojë nikoqirin dhe vinte e hante iftarin. Do të thotë, aspekti i afërsisë familjare ka qenë i më lartë se sa sot. Sot, ne edhe iftaret i kemi materializuar, i kemi zyrtarizuar me numra të caktuar. Do të vini 5 vetë, do të vini 10 vetë… Pa ftesë nuk mund të shkosh askund. Do ta hash iftarin në familje apo do të dalësh ndokund… Kënaqësia ka qenë më e madhe kur ne e kemi bërë iftarin brenda në familje, se sa kur shkojmë në ndonjë restorant, se kush po e bën iftarin në restorant më të shtrenjtë, dhe kush po e zgjedh menynë më të shtrenjtë”, tha mes tjerash Ismaili.
Burimi: TV21
