Aktorja britanike Daisy Edgar-Jones tërhoqi vëmendjen me paraqitjen e saj elegante, teksa ishte në mesin e yjeve që morën pjesë në premierën e filmit “Sense and Sensibility” në Los Angeles të mërkurën.
28-vjeçarja, e cila prej ditësh është e angazhuar në promovimin e dramës romantike të periudhës, u shfaq në tapetin e kuq së bashku me aktoret e tjera të kastit, Caitriona Balfe dhe Esme Creed-Miles.
Filmi është përshtatur nga romani me të njëjtin titull i shkrimtares së njohur angleze Jane Austen, botuar në vitin 1811. “Sense and Sensibility” pritet të shfaqet në kinematë amerikane më 16 tetor, ndërsa deri tani ka marrë vlerësime të përziera nga kritikët, shkruan Daily Mail, transmeton “Bota sot”.
Edgar-Jones u shfaq me një fustan vintage nga Chloé, me një pjesë të sipërme në ngjyrë kremi dhe me prerje korseti, ndërsa materiali i lirshëm rreth shpatullave i dha veshjes një pamje elegante.
Pjesa e sipërme e fustanit kalonte në një fund saten ngjyrë livandoje, të cilin aktorja e kombinoi me një palë këpucë me taka dhe pjesën e përparme të hapur.
Flokët e saj brune ishin ndarë në mes dhe binin natyrshëm mbi supe, të stiluar në onde të lehta.
Burimi: botasot.info
