Chelsea ka shënuar fitore me rezultat 3-1 në udhëtim ndaj Crystal Palace në kuadër të xhiros së 24-të në Ligën Premier.
Crystal Palace mori epërsinë përmes Jefferson Lermas (30’) i cili me një goditje të fuqishme nga distanca mposhti portierin e Chelseat për 1-0.
Pak çaste pa përfunduar pjesa e parë, Conor Gallagher (46’) pati një mundësi të mirë për të barazuar shifrat, por topi shkoi fare pranë shtyllës së majtë.
Në pjesën e dytë Chelsea shtoi intensitetin e lojës dhe kjo më pas iu shpërblye me gola dhe rikthim të rezultatit.
Ishte pikërisht Gallagher (47’) i cili shënoi një super gol për të barazuar shifrat në 1-1 pas asistimit të Malo Gustos.
Gallagher u bë hero i mysafirëve kur në minutën e 91-të shënoi për të rikthyer rezultatin në favor të Chelseat 2-1 pas asistimit të Cole Palmer.
“Blutë e Londrës” nuk u ndalën dhe shënuan edhe një herë tjetër për 3-1, kësaj radhe me Enzo Fernandez (94’) për t’i dhënë fund serisë prej tri ndeshjeve pa fitore në elitën e futbollit anglez.
Chelsea momentalisht gjendet në pozitën e dhjetë në tabelën e klasifikimit me 34 pikë të grumbulluara pas 24 ndeshjeve të luajtura.
