Drejtori i përgjithshëm i Shoqatës Aksionare “MEPSO”, Burim Latifi, njoftoi sot se është hapur tenderi ndërkombëtar për ndërtimin e interkonektorit 400-kilovoltësh ndërmjet Maqedonisë së Veriut dhe Republikës së Shqipërisë, projekt që përfaqëson një hap strategjik për integrimin rajonal dhe forcimin e sigurisë energjetike.
“Kur morëm drejtimin e MEPSO-s, morëm me vete edhe detyrën për modernizimin rrënjësor të rrjetit të transmetimit. Sot njoftoj me krenari hapjen e tenderit për një projekt që jo vetëm ndërton infrastrukturë, por përfundon korridorin energjetik Lindje–Perëndim, që lidh Bullgarinë, Maqedoninë e Veriut, Shqipërinë, Malin e Zi dhe Italinë,” theksoi Latifi.
Ai shprehu keqardhje që për më shumë se tri dekada nuk është bërë progres në këtë drejtim, duke e cilësuar hapin e sotëm si korrigjim të një mungese historike. Ndërtimi i këtij interkonektori do të pozicionojë Maqedoninë e Veriut si një nyje energjetike në Ballkan, me ndikim të drejtpërdrejtë në sigurinë, stabilitetin dhe çmimet e energjisë.
Projekti parashikon ndërtimin e rreth 100 kilometrave linjë transmetimi ajrore nga stacioni transformator Manastir 2 deri në kufirin me Shqipërinë. Investimi pritet të kushtojë rreth 17 milionë euro, të financuara nga Banka Evropiane për Rindërtim dhe Zhvillim (BERZH) dhe fondet evropiane.
Afati për dorëzimin e ofertave është 45 ditë, ndërsa fillimi i punimeve planifikohet në fillim të vitit 2026.
Latifi theksoi gjithashtu se menaxhmenti aktual ka anuluar kontratën me kontraktorin e mëparshëm, pas vonesave dhe shkeljeve serioze, duke vendosur një qasje të re mbi bazën e transparencës, profesionalizmit dhe integritetit.
Në fund, ai falënderoi Qeverinë e Republikës së Maqedonisë së Veriut, ministritë përkatëse, BERZH-in, USAID-in, si dhe operatorin shqiptar për mbështetjen, duke theksuar se MEPSO mbetet e përkushtuar për ndërtimin e një sistemi elektroenergjetik modern dhe të qëndrueshëm.
