Sipas raportimit të Lider.tv, mbrëmë në shtabin partiak të BDI në Çair, ish-ministri i Jashtëm Bujar Osmani ka zhvilluar takim me aktivistë të rinj partiakë, ku thuhet se ka kërkuar mobilizimin e rreth 2.000 aktivistëve për protestën studentore të paralajmëruar për më 18 maj.
Duke iu referuar burimeve partiake, mediumi raporton se Osmani ka kërkuar të sigurohen aktivistë “të zhurmshëm”, gjë që sipas këtyre pretendimeve do të dëshmonte përfshirjen e strukturave partiake në organizimin dhe drejtimin e protestave.
“Osmani ka kërkuar që të sigurohen aktivistë ‘të zhurmshëm’. Kjo tregon se BDI qëndron pas protestave”, citohet të kenë deklaruar burimet për mediumet.
Nëse këto pretendime rezultojnë të sakta, ato mund të ndikojnë në perceptimin publik për protestat studentore, pasi edhe gjatë protestës së parë pati raportime në media për prezencë të elementeve partiake.
Deri më tani nuk ka reagim zyrtar nga BDI apo nga Bujar Osmani lidhur me këto pretendime.
