Brigadat Al-Qassam të krahut të armatosur të grupit palestinez Hamas kanë pretenduar se luftëtarët e saj shkatërruan 27 automjete ushtarake izraelite në Gaza në dy ditët e fundit, transmeton Anadolu.
“Muxhahidët (luftëtarët) tanë shkatërruan 27 automjete ushtarake izraelite pjesërisht ose plotësisht në 48 orët e fundit në akset luftarake (në Gaza)”, tha Abu Obeida, një zëdhënës i Brigadave Al-Qassam.
Obeida shtoi se luftëtarët e Brigadave Al-Qassam goditën gjithashtu forcat izraelite me dhjetëra predha mortajash.
Ushtria izraelite ende nuk ka komentuar mbi njoftimin e grupit palestinez.
Izraeli tha se 30 ushtarë janë vrarë dhe 260 të tjerë janë plagosur që kur filloi operacionet e zgjeruara tokësore në Rripin e Gazës më 27 tetor.
Izraeli ka nisur sulme ajrore dhe tokësore në Rripin e Gazës pas një sulmi ndërkufitar nga Hamasi më 7 tetor.
Të paktën 10.022 palestinezë, përfshirë 4.104 fëmijë dhe 2.641 gra, janë vrarë në bombardimet izraelite në Rripin e Gazës. Sipas shifrave zyrtare, numri i të vdekurve izraelitë është pothuajse 1.600. Përveç numrit të madh të viktimave dhe zhvendosjeve masive, furnizimet bazë po mbarojnë për 2.3 milionë banorët e Gazës për shkak të rrethimit izraelit.
