Bora po bie në Kiev dhe temperatura është duke lëvizur rreth ngrirjes sot, ndërsa miliona banorë të kryeqytetit ukrainas dhe periferive të tij luftojnë për të përballuar ndërprerjet e energjisë dhe ngrohjes qendrore të shkaktuara nga sulmet ajrore ruse.
I ftohti po rrit gradualisht nevojat e konsumatorëve për energji dhe punëtorët po garojnë me kohën për të riparuar infrastrukturën e dëmtuar të energjisë, tha operatori i rrjetit Ukrenergo. Prodhuesit e energjisë ende nuk janë në gjendje të ushqejnë plotësisht rrjetin pas sulmeve raketore të Rusisë të mërkurën e kaluar dhe nuk kanë zgjidhje tjetër veçse të ruajnë energjinë duke detyruar ndërprerjet e energjisë, shtoi ai. “Regjimi i kufizimit të konsumit mbetet në fuqi për shkak të deficitit, i cili është rreth 20%,” tha Ukrenergo në një postim në Telegram.
Moska ka shënjestruar infrastrukturën kritike në javët e fundit, duke shkaktuar ndërprerje të gjerë të energjisë elektrike. Sulmet e së mërkurës së kaluar shkaktuan dëmin më të madh deri më sot, duke lënë miliona pa energji elektrike, ujë apo ngrohje, pasi merkuri ra nën 0 gradë Celsius.
David Arakhamiya, kreu i partisë së Presidentit Volodymyr Zelensky, parashikoi se Rusia do të nisë sulme të reja në infrastrukturë këtë javë, të cilat pritet të jenë “me të vërtetë të vështira”.
Të shtunën mbrëma Zelensky tha se kishte kufizime në përdorimin e energjisë elektrike në 14 nga 27 rajonet e Ukrainës – përfshirë Kievin dhe periferitë e tij. Këto kufizime prekin më shumë se 100,000 konsumatorë në çdo rajon. “Nëse konsumi rritet gjatë natës, mund të rritet edhe numri i ndërprerjeve të energjisë”, tha ai në fjalimin e tij të përditshëm, duke përsëritur apelin e tij drejtuar qytetarëve që të kursejnë energjinë.
Sinoptikanët parashikojnë se reshjet e borës në Kiev do të vazhdojnë deri në mesin e javës ndërsa temperaturat do të mbeten në nivele shumë të ulëta.
