Bomba nga koha e Luftës së Parë Botërore i shpërthen në duar, ndërron jetë 56-vjeçari, dyshohet se…

Një shpërthim fatal ndodhi në provincën e Trevisos në Itali, ku një burrë humbi jetën pasi një bombë e Luftës së Parë Botërore i shpërtheu në duar.

Viktima është identifikuar si Attilio Frare, 56 vjeç, një koleksionist relikesh lufte.

Sipas informacioneve paraprake, 56-vjeçari, i cili kishte precedentë penalë, dyshohet se kishte gjetur dhe sjellë ilegalisht në banesën e tij një mjet shpërthyes të mbetur nga Lufta e Parë Botërore. Teksa po e manipulonte bombën në një magazinë veglash, ajo shpërtheu papritur, duke e vrarë në vend.

Në vendngjarje ndërhynë menjëherë zjarrfikësit, ekipet mjekësore dhe ndihmësit e emergjencës me ambulanca, automjet mjekësor dhe helikopter. Ndërhyrja u bë edhe për të ofruar ndihmë personave të tjerë që ndodheshin pranë në momentin e shpërthimit, megjithëse ende nuk është konfirmuar nëse ka të lënduar.

Skuadra e specializuar e çmontimit të bombave e Karabinierëve siguroi zonën përpara nisjes së hetimeve, pasi në ambient janë gjetur edhe mbetje të tjera potencialisht të rrezikshme.

Autoritetet po vijojnë hetimet për të sqaruar rrethanat e plota të incidentit dhe për të verifikuar nëse në banesë ndodhen edhe mjete të tjera shpërthyese.