Gazetari i mirënjohur shumëvjeçar, Fazli Berisha dhe veprimtari i shquar sportiv, ka shkruar në profilin e tij në facebook, se Kosova me mundime të mëdha ndër vite ka filluar të ndërtojë një ekip kombëtar edhe para pranimit në UEFA e FIFA
“Diçka për shortin e Kombëtares “A”!
Thonë se në futboll asnjëherë nuk mund të parashikosh asgjë, madje disa preferojnë që të parashikojnë fare.
Por, unë vendosa që të shkruaj pak më ndryshe nga parashikimet. Kosova me mundime të mëdha ndër vite ka filluar të ndërtojë një ekip kombëtar edhe para pranimit në UEFA e FIFA. Shumë djersë dhe mund kanë dhënë drejtuesit e FFK-së, trajnerët e ndryshëm e futbollistët që nuk hamendësuan që të radhitën në këto përpjekje të veshin fanellën e Kombëtares së Kosovës.
Adhuruesit e Kosovës dhe jo vetëm i dhanë shpirt e zemër djemve të Kosovës si në humbje ashtu edhe në fitore. Nuk duhet harruar për as një moment mediat që bën gjithçka që të pasqyrohet mundi dhe djersa e të gjithë që dhanë kontributin e tyre.
Mendoj, se Kombëtarja e Kosovës me gjithë mundimet është rritur mjaftueshëm sa më të mos jetë inferiore ndaj askujt dhe asgjëje.
Thonë se çdokush e ka ditën e vet. Ndaj, them se ka ardhur dita e Kosovës. Ka ardhur momenti që nuk mund të kënaqemi vetëm me pjesëmarrje në gara. Të gjithë duam dhe kërkojmë më shumë, sepse dimë dhe mundemi. Ka ardhur dita që të gjithë të shijojmë çastet, emocionet, kënaqësitë dhe bukuritë që sjellë loja e futbollit.
Kjo ditë po troket në dyert tona. Duhet të i hapim. Ky short për Evropianin 2024 është më i miri i mundshëm. Nuk them se është i lehtë sikur që nuk mund të them se nuk është i tejkalueshëm. Gjithçka është e arritshme.
Qysh tash e derisa të ky synim, nga drejtuesit e FFK-së, përzgjedhësi, futbollistët, adhuruesit e mediat me një fjalë i madh e i vogël për asnjë moment nuk duhet të mendojmë tjetërgjë vetëm që Kosova do të kualifikohet për Euro 2024.
Këtë të gjithë duhet ta mendojmë, mëngjes, mesditë, mbrëmje e madje edhe në gjumë kur ëndërrojmë.
O tash o kurrë! Të punojmë fortë e guximshëm. Fati i ndjek të guximshmit”, ka shkruar Berisha.
