Parlamenti Evropian ka dhënë dritën jeshile për të krijuar një mekanizëm të fuqishëm për të kundërshtuar presionin ekonomik të ushtruar nga vendet e huaja për të ndikuar në politikat e vendeve anëtare të Bashkimit Evropian (BE), transmeton Anadolu.
Legjislacioni prezanton një “instrument të ri tregtar” si një pengesë, por ai do t’i mundësojë BE-së të luftojë shtrëngimin ekonomik dhe të përgjigjet me kundërmasa.
Mekanizmi mund të përdoret kundër vendeve të tilla si Kina, të cilat akuzohen nga BE-ja për përfshirje në shtrëngim ekonomik.
BE-ja në tërësi dhe vendet anëtare në mënyrë individuale do të kenë mjetet për të mbrojtur veten kundër shtrëngimit ekonomik dhe presionit të panevojshëm nga vendet e huaja.
Mekanizmi inovativ do të hyjë në lojë kur vendet jo anëtare të BE-së do të përpiqen të ushtrojë presion ekonomik ndaj BE-së ose një vendi anëtar të caktuar nëpërmjet masave tregtare ose investimeve ose një kërcënimi për secilën prej tyre.
Ndër masat për t’iu përgjigjur shtrëngimit ekonomik janë kufizimet në tregtinë e mallrave dhe shërbimeve, kufizimet në investimet e huaja direkte, imponimi i licencave të importit ose eksportit, si dhe krijimi i barrierave për qasjen në mundësitë e prokurimit publik.
Çelësi për efektivitetin e mekanizmit është roli i Komisionit Evropian në kryerjen e hetimeve të plota në rastet e shtrëngimit ekonomik. Pasi të përfundojë një hetim, komisioni do t’u paraqesë gjetjet vendeve anëtare.
Më pas, vendet anëtare do të vendosin, me shumë votash, nëse do të aktivizojnë dhe do të autorizojnë Komisionin Evropian për të ndërmarrë veprimet e duhura.
