Bashkimi Evropian (BE) tha se do të vazhdojë të mbështesë Türkiyen lidhur me “refugjatët dhe komunitetet pritëse”, transmeton Anadolu.
Komisioni Evropian ka bërë një deklaratë me shkrim për publikimin e raportit të shtatë i cili përgatitet çdo vit lidhur me “mbështetjen që BE-ja i jep Türkiyes lidhur me refugjatët dhe komunitetet pritëse”.
Në deklaratë thuhet se në bashkëpunim të ngushtë me autoritetet turke, është shënuar përparim i rëndësishëm në fushat kyçe të tilla si nevojat bazë, arsimi, shëndetësia, mbështetja socio-ekonomike, forcimi i infrastrukturës komunale dhe menaxhimi i kufirit.
Türkiye “vazhdon të jetë vendi që pret komunitetin më të madh të refugjatëve në botë dhe që tregon përpjekje të rëndësishme në çështjen e plotësimit të nevojave të tyre”, thuhet në deklaratë, ku citohet Komisari i BE-së për Zgjerimin dhe Politikën e Fqinjësisë, Oliver Varhelyi, i cili ka thënë:
“BE-ja do të vazhdojë të qëndrojë pranë refugjatëve dhe komuniteteve pritëse në Türkiye. Në përputhje me realitetet aktuale në terren, Komisioni i ka bërë propozim vendeve anëtare që të vazhdojnë mobilizimin e mbështetjes përtej vitit 2023 si një investim i madh në stabilitet dhe siguri. Shpresoj që në mesin e vendeve anëtare të arrihet me shpejtësi rezultat lidhur me çështjen”.