Bashkim Bakiu, funksionar i lartë në Aleancën për Shqiptarët, krahu i Arben Taravari, ka bërë sot një deklaratë të qartë në rrjetet sociale ku distancohet nga çdo ide për rikthimin e bashkëpunimit me Bashkimin Demokratik për Integrim.
Në një status në facebook, Bakiu theksoi se ai mbetet i përkushtuar ndaj rrugës për ndryshim që Aleanca për Shqiptarët e nisi para zgjedhjeve të vitit 2024, duke lënë të kuptohet se çdo përpjekje për rikthim në bashkëpunim me BDI-në për të qenë opozitë bashkë, nuk gjen mbështetjen e tij.
“Duke u konsultuar me miq, edhe i vetëdijshëm për zhvillimet politike, dua të qartësoj se mbetemi në rrugën e nisur për ndryshim që para zgjedhjeve të vitit 2024. Ashtu si e filluam, ashtu edhe do të vazhdojmë, për ndryshimin që ka filluar, e që patjetër ka ende për të punuar,” shkroi Bakiu në postimin e tij.
Ai shtoi se ky rrugetim kërkon qëndrueshmëri, vizion dhe angazhim, duke nënvizuar se nuk bëhet fjalë për hatërmbetje personale, por për një qëndrim parimor politik.
