Kapiteni i përfaqësueses së Maqedonisë së Veriut, Enis Bardhi, thotë se shiriti i kapitenit gjithmonë i sjell motiv shtesë. Ballafaqimi mes Bullgarisë dhe Maqedonisë së Veriut do të luhet nesër (18.00), në kuadër të Grupit 4 të Ligës së Kombeve, rangu C.
“Është një nder dhe kënaqësi e madhe për mua të mbaj shiritin e kapitenit.
Është e vërtetë që do të mbaj shiritin, por gjithmonë theksoj se në këtë ekip jemi të gjithë kapiten dhe të gjithë kontribuojmë njësoj për suksesin e kësaj kombëtareje.
Për mua më e rëndësishmja është të kontribuoj në mënyrë të barabartë në sukseset e Maqedonisë. Meqë ra fjala, kur isha kapiteni i fundit i kombëtares, si mysafirë fituam (0:5) ndaj Armenisë, shënova tre gola.
Tani jam përsëri kapiten”, tha Bardhi në një konferencë për shtyp në Razgrad.
“Natyrisht ky fillim i sezonit të ri në Ligën e Kombeve është i rëndësishëm për ne. Dëshirojmë një fillim të mbarë, çdo ndeshje e radhës është më e rëndësishmja për ne për momentin, kështu që me siguri tani jemi të fokusuar vetëm në duelin me Bullgarinë”, tha Bardhi.
