Azerbajxhani i dërgoi një notë diplomatike Rusisë në lidhje me “shfrytëzimin e paligjshëm” të burimeve natyrore në rajonin e çliruar të Karabakut, pasi zyrtarët e tij u penguan të hynin në rajon një ditë më parë, transmeton Anadolu Agency (AA).
Ministria e Jashtme tha se Baku i ka bërë thirrje në mënyrë të përsëritur komandës së kontingjentit paqeruajtës rus në rajon për të parandaluar “shfrytëzimin e paligjshëm” të burimeve natyrore dhe për të eliminuar ndikimin e tij negativ në mjedis, por pa rezultat.
“Sipas informacioneve të marra nga Azerbajxhani, vërehet shfrytëzim i paligjshëm dhe grabitje e burimeve natyrore, veçanërisht në minierën e arit Kyzylbulag dhe atë të bakër-molibdenit Demirli”, thuhet në një deklaratë.
“Në përputhje me marrëveshjen e arritur, u kërkua edhe një herë që përfaqësuesve të Azerbajxhanit t’u sigurohet akses i papenguar në minierat e në fjalë”, theksohet më tej.
Komunikata vuri në dukje se negociata u mbajtën midis dy palëve dhe një marrëveshje u arrit të shtunën, por megjithatë zyrtarët nga Baku u penguan të vizitonin zonën.
“Për shkak të faktit se kontingjenti paqeruajtës rus nuk ndërmori asnjë veprim, një veprim i planifikuar paraprakisht nga banorët vendas e pengoi vizitën”, thuhet në njoftim.
Deklarata shtoi se në notën diplomatike theksohet se është “e papranueshme të pengohet një udhëtim i tillë ose të vendoset ndonjë kusht”, duke theksuar nevojën që kontigjenti paqeruajtës rus të “respektojë rreptësisht sovranitetin dhe integritetin territorial të Republikës së Azerbajxhanit në të gjitha aktivitetet e tij, në përputhje me marrëveshjen e paqes të nënshkruar midis Azerbajxhanit dhe Armenisë në nëntor 2020”.
Baku çliroi Karabakun, një territor i njohur ndërkombëtarisht si pjesë e Azerbajxhanit, dhe disa rajone të tjera që ishin nën pushtimin armen për gati tri dekada, pas përleshjeve në vjeshtën e vitit 2020. Luftimet përfunduan pas një armëpushimi të ndërmjetësuar nga Moska. Që atëherë, trupat paqeruajtëse ruse janë vendosur në rajon.
