Gjatë 24 orëve të fundit, në rajonin e Prishtinës janë shqiptuar 1.098 gjoba për kundërvajtje të ndryshme në komunikacion.
Po ashtu edhe zyrtarët e stacioneve policore në kuadër të detyrave rutinore po merren me kundërvajtjet në trafik.
Zyrtarët e stacionit policor të Obiliqit, sot bazuar në ligjin e ri të trafikut, kanë bërë sekuestrimin e një automjeti si dhe kanë gjobitur ngasësin që ka qenë duke drejtuar automjetin pa patentë-shofer. Ngasësi ka qenë i gjobitur me masë mbrojtëse – sekuestrim të patentë-shoferit.
Ndryshe, ngasësit e automjeteve nga sot duhet të kenë kujdes në zbatimin e rregullave të reja, pasi me hyrjen në fuqi të ligjit të ri parashihen gjoba të larta për shkelësit e këtyre rregullave në trafik.
Ashpërsimi i gjobave me ligjin e ri vjen si pasojë e numrit të lartë të aksidenteve, vetaksidenteve dhe aksidenteve me fatalitet të shumta në vendin tonë.
Me ligjin aktual për mos vendosjen e rripit të sigurisë, gjoba është 150 euro për shoferin dhe për pjesëmarrësit tjerë në automjet, gjoba për telefon do të jetë në tre variante, për herë të parë do të gjobitet për 100 euro, herën e dytë 200 euro dhe herën e tretë 500 euro dhe gjashtë muaj ndalohet të ngasë veturën.
Ndërsa për shpejtësi brenda vendbanimit 20 euro për tejkalim të shpejtësisë nga 5 – 10 kilometra në orë (km/h) mbi shpejtësinë e lejuar, 40 euro për tejkalim të shpejtësisë nga 10 – 20 km/h mbi shpejtësinë e lejuar, 60 euro për tejkalim të shpejtësisë nga 20 – 30 km/h mbi shpejtësinë e lejuar, 200 euro dhe tre muaj ndalim i drejtimit të mjetit, plus tri pikë negative për tejkalim të shpejtësisë nga 30 – 50 km/h mbi shpejtësinë e lejuar dhe shumë rregulla të tjera.
Të paktën 104 të vdekur dhe mijëra të lënduar është bilanci i aksidenteve rrugore për 2023. Sipas policisë, gjatë 2023 janë shënuar mbi 22.000 aksidente. Krahasuar me 2022, numri i aksidenteve për 2023 është rritur mbi 1.000.
