Një kanal Telegram pro-ukrainas i inteligjencës bjelloruse në internet, Belaruski Hayun, thotë se ka vërejtur lëvizje të konsiderueshme të pajisjeve të forcave të armatosura ruse me tren nëpër Bjellorusi të dielën.
Ai thotë se trena të ngarkuar me pajisje ushtarake janë parë në stacionet hekurudhore në kryeqytetin Minsk dhe gjithashtu në Bjellorusinë juglindore, duke përfshirë stacionet Kalinkavichy, Khoyniki dhe Homel North, shkruan BBC, përcjell “Bota sot”.
Kamionë dhe tanke u panë gjithashtu në një tren në stacionin hekurudhor Rechytsa në juglindje. Sistemet e raketave kundërajrore dhe mjetet e blinduara amfibe u vunë re që prisnin të ngarkoheshin aty pranë.
Gjashtë avionë luftarakë dhe avionë transporti u ngritën nga aeroporti Baranavichy në perëndim të Bjellorusisë dhe disa helikopterë rusë u ngritën nga Machulishchy afër Minskut.
Presidenti i Bjellorusisë Aleksandër Lukashenko ka qenë aleat i presidentit rus Vladimir Putin gjatë gjithë luftës në Ukrainë.
Rusia ka tërhequr trupat nga Kievi dhe po e zhvendos pjesën më të madhe të fokusit të luftës së saj në Ukrainën lindore.
