Apple ka njoftuar se po zhvendos shumicën e prodhimit të iPhone-ve dhe pajisjeve të tjera të destinuara për tregun amerikan nga Kina drejt Indisë dhe Vietnamit, si reagim ndaj tarifave të reja të vendosura nga administrata e Presidentit Donald Trump.
Sipas CEO-së Tim Cook, shumica e iPhone-ve të shitura në SHBA do të prodhohen në Indi, ndërsa Vietnami do të jetë qendra kryesore për prodhimin e iPad-eve, Mac-ëve, Apple Watch dhe AirPods.
Apple vlerëson se tarifat e reja amerikane mund t’i shtojnë rreth 900 milionë dollarë kostove të saj në këtë tremujor, megjithëse disa produkte si telefonat dhe kompjuterët janë përjashtuar nga tarifat. Administrata Trump ka bërë presion të vazhdueshëm që Apple të zhvendosë prodhimin në SHBA, ndërsa vetë kompania ka premtuar një investim prej 500 miliardë dollarësh në territorin amerikan gjatë katër viteve të ardhshme.
Pavarësisht tensioneve tregtare, Apple raportoi një rritje të të ardhurave me 5% në tremujorin e parë të vitit 2025, duke arritur 95.4 miliardë dollarë. Fitimet u rritën me mbi 60%, duke kapur vlerën e 17 miliardë dollarëve. Analistët e industrisë e kanë cilësuar zhvendosjen e prodhimit si një “ndryshim të jashtëzakonshëm” në strategjinë e Apple, duke theksuar largimin gradual nga varësia ndaj Kinës.
Burimi: botasot.info
