Ankesa për drejtoreshën e re të Klinikës “Kozle” Karolina Simonovska. TV21 mëson se të punësuarit po ankohen për shumë çështje si shkarkimi i ekspertëve duke lënë ekipin me mjekë të rinj pa përvojë, menaxhim i papërshtatshëm, shkelje të procedurave, keqpërdorimi i resurseve, sjellje papranueshme, ngacmim psikologjik dhe shpifje.
Për shembull, mes problemeve të identifikuara, nga ato që mësoi TV21, është se dy nga anëtarët më të përvojë të ekipit të bronkoskopisë kanë dhënë dorëheqje për shkak të pamundësisë për të bashkëpunuar me drejtoreshën, e cila i ka pranuar dorëheqjet pa diskutim, duke lënë ekipin me mjekë të rinj pa përvojë, gjë që rrezikon shëndetin e fëmijëve.
Nga ana tjetër, mjekët po ashtu ankohen se drejtoresha krijon ekipe të reja për alergologji dhe spirometri, duke injoruar ekspertët me përvojë si dhe vendimmarrje pa konsultim, duke shkelur statutet ekzistuese dhe emëruar mjekë me pak përvojë në pozita drejtuese, ndërsa kërkesat e stafit nuk përfshihen në rendin e ditës të mbledhjeve të bordit drejtues. Mjekët po ashtu ankohen se i vetmi ekspert për tuberkuloz të fëmijëve është degraduar dhe drejtuesve të departamenteve përkatëse u janë hequr kompetencat.
Përveç këtyre shqetësimeve të të punësuarve për aspektin menaxherial, ankesa kanë edhe për sjellje të drejtoreshës, duke krijuar atmosferë frike e tensioni si dhe duke praktikuar edhe ngacmim psikologjik ndaj stafit të mesëm, veçanërisht ndaj laboratorëve.
TV21 u përpoq që këto shqetësime mjekët t’i paraqesin edhe para kamerës, por me sa kuptuam, tani për tani, nga frika e pasojave, nuk ishin të gatshëm ta bëjnë një gjë të tillë. Për këtë arsye me pyetje iu drejtuam Ministrit të Shëndetësisë, Arben Taravari, i cili ishte i njoftuar me rastin.
Nëse Taravari do të ndërmarrë ndonjë gjë, mbetet të shihet ditëve në vijim, por ndër shqetësimet e të punësuarve tek të cilat arriti TV21, mes tjerash thuhet edhe se situata kërkon ndërhyrje urgjente për të garantuar menaxhim të duhur dhe për të mbrojtur shëndetin dhe mirëqenien e pacientëve.
Burimi: tv21
