Aktorja e njohur kubane Ana de Armas dhe këngëtari venezuelian Beto Montenegro janë shfaqur së bashku në tapetin e kuq të ceremonisë gala “Person of the Year”, të organizuar nga Latin Recording Academy në Las Vegas, shkruan “Bota sot”.
Çifti mori pjesë në këtë ngjarje, e cila këtë vit i kushtohej këngëtarit të njohur Daddy Yankee, i nderuar për karrierën e tij gati tredekadëshe dhe kontributin në përhapjen e muzikës reggaeton në mbarë botën.
De Armas, 38-vjeçare, dhe Montenegro, 37-vjeçar, pozuan së bashku para fotografëve, duke e bërë edhe një herë publike lidhjen e tyre.
Aktorja zgjodhi për këtë mbrëmje një krijim të stilistit Wiederhoeft, ndërsa paraqitja e saj tërhoqi vëmendjen e mediave të showbiz-it.
Edhe pse dyshja ishte parë që nga vera e kaluar duke kaluar pushime së bashku dhe duke marrë pjesë në koncerte, lidhjen e tyre e bënë publike në tetor, kur u shfaqën dorë për dore në sfilatën e Louis Vuitton gjatë Javës së Modës në Paris.
Paraqitja e fundit në Las Vegas shënon një tjetër moment publik të çiftit, i cili tashmë nuk po e mban të fshehtë romancën e tij.
Burimi: botasot.info
