Në një tubim madhështor të organizuar nga Aleanca Kombëtare për Integrim (AKI) në komunën e Çairit, lideri Ali Ahmeti mbajti një fjalim të fuqishëm, duke dhënë një mesazh të qartë për zgjedhjet lokale të 19 tetorit dhe duke kërkuar mbështetje për kandidatin e AKI-së, Bujar Osmani.
“Më 19 tetor votoni numrin 4. Numri 4 është krenaria jonë kombëtare, nga Struga deri në Likovë e Kumanovë. Nuk do t’ju zhgënjejmë, ashtu siç nuk ju kemi zhgënjyer deri tani,” deklaroi Ahmeti.
Ai theksoi rolin historik të lidershipit shqiptar në integrimin e vendit në strukturat ndërkombëtare.
“Ne këtë vend e anëtarësuam në NATO, zotëri Sela. Tani, ne duhet ta anëtarësojmë edhe në Bashkimin Evropian, sepse këtu janë njerëzit e dijes, me kulturë dhe nga fusha më të ndryshme, nuk ka motor që nuk e kemi lëvizur. Edhe vetmin në Evropë do e çojmë”, tha Ahmeti.
Në vijim, ai dërgoi një mesazh të prerë lidhur me Marrëveshjen e Ohrit dhe proceset euro-integruese.
“Të vetmit jemi ne që i dalim zot Marrëveshjes së Ohrit dhe Maqedonisë. Në Evropë shkohet vetëm nga Ohri rrugë tjetër nuk ka.”, tha ai.
Duke kritikuar ashpër opozitën, Ahmeti shtoi.
“E këta të VLEN-it nuk e dinë çka është Marrëveshja e Ohrit, sepse ata janë aty për të kënaqur nevojat e tyre personale.”, e përfundoi Ahmeti.
Tubimi në Çair u vlerësua si një nga më të mëdhenjtë dhe më domethënësit e kësaj fushate, ku përkrahësit e AKI-së shfaqën entuziazëm dhe vendosmëri për të mbështetur “ndryshimin e ndryshimit”, nën udhëheqjen e Bujar Osmanit.
