Përmes komunikatave për media, Aleanca e Ziadin Selës po merr rolin e hetuesit, paragjykon dhe përmend emra pa pasur kujdes për prezumcionin e pafajsisë, shkruan politiko.mk
Në incidentin e përmendur nga Aleanca, i cili ka ndodhur mbrëmë në Çair të Shkupit, asnjë nga aktorët ska qenë zyrtar i BDI-së.
Kjo është komunikata e Aleancës përmes të cilës hutohet opinioni:
Krimi i BDI-së çdo ditë rrezikon jetën e qytetarëve
Incidenti i mbrëmshëm në Çair ku janë përfshirë zyrtarët më të lartë policorë është pasqyra më e mirë e qeverisjes së BDI-së. Krimi i kësaj partie ka prekur majat më të larta të pushtetit. Ata që duhet të punojnë për sigurinë janë bërë rreziku më i madh për shqiptarët në veçanti dhe qytetarët në përgjithësi. BDI i ka bërë lagjet shqiptare vendet më të rrezikshme për jetesë, janë bërë vende ku tanimë të vret zyrtari policor dhe ku mbrohen kriminelët.
Kur denoncuam kapjen e sistemit të drejtësisë, zëvendësministri i BDI-së u ankua se opozita po njollos funksionarët shqiptarë. Pyesim ish ministrin e policisë, zëvendësministrin e sotëm të policisë dhe gjithë funksionarët e BDI-së, kush i ofendoi dhe turpëroi mbrëmë shqiptarët, kush i rrezikoi shqiptarët nga plumbat e kryeshefave të tyre dhe po i kthen lagjet shqiptare në geto të karteleve kriminale!?
Vetingu në drejtësi, polici dhe sferat e tjera është mëse i domosdoshëm, por paraprakisht duhet t’i largojmë nga pushteti këta që pengojnë vetingun dhe forcojnë krimin dhe korrupsionin.
