Ish-eprori i lartë i UÇK-së dhe ish-agjenti i SHIK-ut, Naim Miftari, ka bërë akuza të rënda dhe të drejtpërdrejta ndaj disa figurave kyçe të ish-UÇK-së dhe politikës duke kërkuar hetime mbi lidhjet e tyre të mundshme me agjencitë e huaja të inteligjencës.
Sipas Miftarit, ish-presidenti Hashim Thaçi dhe ish-kreu i SHIK-ut, Kadri Veseli, dyshohet të jenë rekrutuar nga agjenti francez Denis Arnaud, një përfaqësues i DGSE-së franceze, që thuhet të ketë lidhje me Serbinë përmes lidhjeve personale dhe familjare.
Ai pretendon se këto veprime kanë shërbyer kundër interesave të Kosovës, duke favorizuar aleancat historike serbo-franceze.
Miftari po ashtu ngre shqetësime për lidhjet e mundshme të vëllait të Thaçit, Gani Thaçi, me shërbimet sekrete serbe.
Ai pretendon se Gani Thaçi fillimisht është rekrutuar nga një kolonel i shërbimit ushtarak serb në Prishtinë dhe më pas nga UDB-ja e udhëhequr nga Ivica Stanishiq.
Akuzat përfshijnë përcjelljen e informacioneve të ndjeshme për lëvizjet dhe aktivitetet e komandantëve dhe luftëtarëve të UÇK-së, duke përfshirë Adem, Hamzë dhe Shaban Jasharin, si dhe luftëtarë të tjerë të njohur të Drenicës.
“Hashim Thaçi duhet me dhanë shpjedime se si u rekrutua ai dhe Kadri Veseli nga agjenti Denjar Arnaud i DGSE-së francese, si dhe çfarë shërbimesh i bënë kundër Kosovës. Po ashtu duhet me dhënë shpjegime edhe se si vëllai i tij Gani Thaçi u rekrutua përmes cernagorit N.M. së pari një kolonel i shërbimit sekret ushtarak serb në Prishtinë dhe më vonë nga UDB-ja e Ivisa Stanishiqit, sidomos çfarë informacione sekrete ia përcillte rregullisht vëllai i liderit të UÇK-së shërbimit sekret serb për UÇK-në, sidomos për lëvizjet e komandantëve të luftës në Drenicë, duke filluar nga Adem, Hamëz, Shaban Jashari, Besim Rama, Mustaqen, Demën, 10-tshin…”, thotë Miftari.
Miftari thekson se këto akuza kërkojnë hetim të thelluar për të zbardhur të vërtetën dhe për të ndriçuar ndikimin që mund të kenë pasur këto veprime në luftën për çlirimin e Kosovës.
Ai kërkon gjithashtu që Hashim Thaçi, Kadri Veseli dhe personat e tjerë të përmendur të japin sqarime publike për këto çështje.
Akuzat e Naim Miftarit hapin një kapitull të ri të debatit mbi rolin e shërbimeve sekrete të huaja dhe ndikimin e tyre në të kaluarën politike dhe ushtarake të Kosovës.
Nëse këto pretendime rezultojnë të vërteta, ato përbëjnë një goditje të rëndë për trashëgiminë e luftës së UÇK-së dhe kredibilitetin e disa prej liderëve të saj kryesorë.
Burimi: botasot.info
