Aktivisti rus i opozitës, Andrei Pivovarov u dënua me katër vjet burg për drejtimin e një grupi të ndaluar pro-demokracisë, lëvizja e fundit në goditjen e shumëfishtë të Kremlinit ndaj aktivistëve të opozitës, mediave të pavarura dhe grupeve të të drejtave në vend.
Sipas medieve të huaja, përcjell Telegrafi, Pivovarov, 40 vjeç, është ish-kreu i Open Russia, një grup tashmë i shpërbërë pro-demokracisë, i krijuar nga manjati në mërgim Mikhail Khodorkovsky.
Ai u dënua të premten nga një gjykatë në qytetin jugor rus të Krasnodarit pasi u akuzua për “drejtim të një organizate të padëshiruar”, e cila është një vepër penale sipas një ligji të vitit 2015.
Siç bëhet e ditur, ai ishte i shprehur i pafajshëm dhe këmbënguli se akuzat ndaj tij ishin ngritur për shkak të planeve të tij për të kandiduar në parlament në shtator të vitit 2021.
“Andrei Pivovarov u dënua me katër vjet në një koloni penale të regjimit standard”, kanë shkruar ndihmësit e tij në Facebook pas vendimit. Aktivistit do t’i ndalohet edhe aktiviteti politik për tetë vjet.
Duke folur në gjykatë, Pivovarov tha se ndryshimi në Rusi do të vinte, herët a vonë.
