Aggeler: Mirë që presidentja Siljanovska Davkova do shkojë në Bullgari, historia është e rëndësishme, por edhe e ardhmja

20

Shkup, 12 shtator – Ambasadorja e SHBA-së, Angela Ageler, mendon se është mirë që presidentja Gordana Siljanovska-Davkova nesër do të shkojë në Sofje, ku pritet të takohet me presidentin e Bullgarisë, Rumen Radev.

Ageler tha se sa më shumë vendet të bashkëpunojnë si fqinjë, aq më i madh do të jetë përparimi për të gjithë qytetarët.

“Për mendimin tim është mirë që presidenti po shkon në Bullgari me ftesë të presidentit Radev. Këto lidhje në rajon janë shumë të rëndësishme, sepse ju jeni fqinjë. Sa më të forta të jenë marrëdhëniet midis fqinjëve, aq më i sigurt, më i begatë dhe më i qëndrueshëm mund të jetë çdo vend”, tha Ageler.

Në lidhje me emërimin e anëtarëve të rinj të Komisionit Historik me Bullgarinë, Ageler thotë se historia është e rëndësishme, por po aq e rëndësishme është të diskutohet edhe për të ardhmen.

“Një nga gjërat që kam diskutuar edhe me qeverinë e mëparshme edhe tani me këtë qeveri të re është se historia është shumë e rëndësishme, ajo na përcakton të gjithëve. Historia jonë si shtete na ka sjellë këtu ku jemi sot. Jo vetëm që është e rëndësishme të diskutohet historia, e di që kjo është pjesë e marrëveshjeve dypalëshe dhe ndërkombëtare, është gjithashtu e rëndësishme të diskutohet për të ardhmen. Shpresa ime kryesore është që ndërsa flasim për historinë e përbashkët që Maqedonia e Veriut ka me fqinjët e saj, veçanërisht me Bullgarinë, ata gjithashtu të flasin se si do të ecim përpara në drejtim të transportit, energjisë, shkëmbimeve arsimore. Shpresoj që ata të mos shikojnë vetëm historinë, por edhe të ardhmen”, tha Ageler.

Për zgjedhjet në SHBA dhe çfarë do të jetë mbështetja pas zgjedhjes së presidentit të ri amerikan, Ageler tha se pavarësisht rezultatit të zgjedhjeve, Shtetet e Bashkuara do të mbeten një mik, aleat dhe partner i fortë i vendit.

“Miqësia dhe mbështetja jonë nuk do të ndryshojë. Kjo do të mbetet e qëndrueshme dhe mund t’ju siguroj se ndërsa jam këtu si ambasador do të bëjmë gjithçka që mundemi për të mbështetur programet për të cilat keni punuar shumë që nga pavarësia”, tha Ageler.