Nëntëmbëdhjetë persona humbën jetën si pasojë e shpërthimit të një cisterne karburanti në Tunelin Salang, e vetmja portë që lidh provincat veriore të Afganistanit me kryeqytetin Kabul, transmeton Anadolu Agency (AA).
Në një deklaratë për shtyp, zëdhënësi i provincës Pervan, Said Himatullah Shamim, tha se 19 persona humbën jetën dhe 32 u plagosën si pasojë e shpërthimit të një cisterne karburanti në tunelin Salang mbrëmë.
Shamim tha se në mesin e viktimave të incidentit kishte gra dhe fëmijë dhe se ka njerëz të bllokuar në tunel. Ai shtoi se numri i të vdekurve mund të rritet.
Mevlevi Hamidullah Misbah, zëdhënës i Ministrisë së Punëve Publike të qeverisë së përkohshme talebane, tha se shumë automjete u dogjën, por zjarri është vënë nën kontroll.
Dëshmitarët okularë njoftuan se tuneli është mbyllur për kalime dhe qindra njerëz kanë mbetur të bllokuar.
Ministria e Shëndetësisë njoftoi se të lënduarit janë dërguar në spital.
Raportohet se shpërthimi ka ndodhur si pasojë e përmbysjes së cisternës.
