Gjenomi i Ludwig van Beethoven zbulon se kompozitori dhe pianisti gjerman vuante nga hepatiti B para vdekjes së tij, sipas një studimi të sapo publikuar, transmeton Anadolu.
Një ekip ndërkombëtar shkencëtarësh u mblodhën në kuadër të hulumtimit, të udhëhequr nga Universiteti i Kembrixhit, për të zbuluar detaje të rëndësishme në lidhje me shëndetin dhe shkakun e vdekjes të mjeshtrit të muzikës klasike.
Kjo është hera e parë që gjenomi i Beethovenit u sekuencua nga një ekip ndërkombëtar shkencëtarësh duke përdorur pesë fije të flokëve të tij që përputhen gjenetikisht.
Studimi, i cili u publikua në Current Biology të mërkurën, zbuloi se ADN-ja e pesë fijeve të flokëve, që datojnë nga shtatë vitet e fundit të jetës së Beethoven, e kanë origjinën nga një individ i vetëm që përputhet me prejardhjen e dokumentuar të kompozitorit.
“Megjithëse nuk mund të identifikonim një shpjegim gjenetik për çrregullimin e dëgjimit ose problemet gastrointestinale të Beethovenit, ne zbuluam se Beethoven kishte një predispozitë gjenetike për sëmundje të mëlçisë”, thanë shkencëtarët.
Beethoven kishte një infeksion të hepatitit B të paktën disa muaj para vdekjes së tij, tha hulumtimi.
“Së bashku me predispozicionin gjenetik dhe faktin e njohur gjërësisht të konsumit të alkoolit, këto paraqesin shpjegime të besueshme për sëmundjen e rëndë të mëlçisë së Beethovenit, e cila kulmoi me vdekjen e tij”, kanë theksuar shkencëtarët.