Që në mëngjes inspektorët kryen kontrolle të jashtëzakonshme në Spitalin e Manastirit për të konstatuar arsyet për vdekjen e vajzës 6 vjeçare Jana, përkatësisht të konstatohet nëse bëhet fjalë për gabim të mjekëve. Babai i Janës tha se kur e ka sjellë vajzën e tij në spital ka pasur ftohje dhe temperaturë pak të lartë. Atje i ka dhënë glukozë në infuzion edhe paraprakisht analiza ka treguar se vlera e sheqerit në gjak ishte 9.
“Pas infuzionit niveli i sheqerit në gjak u rrit në 19, pas çka gjendja iu përkeqësua. E dërguan në një sallë tjetër, thirrën anesteziologë, i dhanë diçka dhe pak iu përmirësua gjendja. I vendosën aparat për ndjekjen e punës së zemrës, për pulsin, oksigjen. Anesteziologët u larguan dhe vajza përsëri filloi të humbet. Unë e shikoja përmes xhamit. Provuan me elektroshok, me masazh të kraharorit që ta kthejnë, por pa sukses”, tha Stojçe Hristovski, babai i Janës.
Kryeministri Dimitar Kovaçevski dhe ministri i shëndetësisë, Fatmir Mexhiti, pohojnë se nëse dëshmohet se bëhet fjalë për gabim të mjekëve do të kërkohet përgjegjësi. Mexhiti tha se që dje është në komunikim të vazhdueshëm me personat përgjegjës të spitalit dhe se sot ka takim me drejtorin e spitalit Aleksandar Obedinkovskin për t’i referuar për rastin.
“Në lidhje me këtë rast është informuar Prokuroria publike. Të gjithë detajet do të ndahen me opinionin kur t’i kenë institucionet kompetente. Duhet në bazë të fakteve të konfirmohet gjendja objektive se çfarë ka ndodhur atje dhe në bazë të atyre fakteve të shqiptohen sanksione adekuate atje ku duhet”, theksoi Dimitar Kovaçevski, kryeministër.
“Sapo dëgjuam dje menjëherë vepruam, siç tha edhe kryeministri, shërbimet e inspektimit janë atje dhe presim epilog dhe menjëherë do të informoheni. Ne ishim në kontakt me familje, kemi kontakt edhe me to, së pari të shohim ku është gabimi. D.m.th. presim epilog nga institucionet kompetente, nga Inspektoratit Sanitar dhe menjëherë do të informoheni në lidhje me atë se çfarë do të veprojmë më tej”, deklaroi Fatmir Mexhiti, ministër i Shëndetësisë.
Obduksioni i Janës së vogël ka përfunduar dje, por ende nuk ka rezultate në lidhje me atë se cila është arsyeja konkrete për vdekjen e vajzës.
Burimi: TV21
