A e dini sa pajisje përdorin iOS 18?

Apple e publikoi iOS 18 gjatë vitit 2024 dhe tani janë bërë të ditura edhe shifrat zyrtare të përhapjes së këtij versioni, bashkë me të dhënat për iPad dhe sistemin iPadOS 18.

Sipas statistikave zyrtare nga Apple, plot 88 për qind e iPhone-ve të prezantuar në katër vitet e fundit tashmë përdorin iOS 18. Nëse marrim parasysh të gjitha pajisjet në qarkullim, përfshirë edhe më të vjetrat, kjo përqindje është 82 për qind, çka mbetet një shifër shumë mbresëlënëse. Po ashtu, 9 për qind e pajisjeve të tjera ende përdorin iOS 17.

Është e pritshme që një pjesë e vogël e përdoruesve të mos duan të përditësojnë telefonin e tyre, por në këtë rast, ky numër është mjaft i ulët.

Sa i përket iPad-it, 81 për qind e pajisjeve të reja janë të përditësuara në iPadOS 18, ndërsa në shkallë të përgjithshme kjo shifër është 71%. Kjo mund të lidhet me faktin se shumë përdorues i përdorin iPad-et vetëm për detyra bazike, si shfletimi i internetit apo shikimi i videove, dhe nuk ndjejnë nevojën për funksionalitete të reja.

Apple pritet të prezantojë versionin e radhës të iOS dhe iPadOS gjatë konferencës WWDC javën e ardhshme. Megjithatë, nuk është e sigurt nëse versioni i ri do të quhet iOS 19, pasi sipas thashethemeve të fundit, Apple mund të kalojë në sistemin e emërtimit sipas viteve — gjë që do të thotë se mund të shohim një iOS dhe iPadOS 26.

Po Androidi si qëndron?

Sipas një raporti nga 9to5Google në prill, Android 15 është i instaluar në vetëm 4.5 për qind të pajisjeve Android.

Në të vërtetë, versioni më i përdorur i Android-it aktualisht është Android 14, i cili përbën 27.4 për qind të të gjitha instalimeve.

Arsyeja kryesore pse përqindjet janë kaq të ulëta në krahasim me Apple-in, lidhet me mënyrën se si shpërndahen përditësimet në Android — ku çdo prodhues pajisjesh (si Samsung, Xiaomi etj.) vendos vetë kur (dhe nëse) do të ofrojë përditësimet për pajisjet e tij.

Megjithatë, Google ka filluar të bëjë disa ndryshime në mënyrën e publikimit të përditësimeve kryesore të Android-it, ndaj këto statistika mund të ndryshojnë në të ardhmen.