Tarifat e vendosura ndaj Kinës nga presidenti amerikan Donald Trump mund të rrisin koston e prodhimit të iPhone në Kinë deri në 43 për qind.
Barton Crockett, një analist nga Rosenblatt Securities, tha për mediat britanike se tarifat mund të shtojnë koston e prodhimit të telefonit të popullarizuar, i cili prodhohet kryesisht në Kinë.
Kjo do të thotë që një iPhone 16 Pro Max, i cili kushton 1.599 dollarë, mund të shitet me pakicë 2.300 dollarë, por vetëm nëse Apple ua kalon të gjitha kostot shtesë konsumatorëve. Ndërkohë, iPhone 16e më i përballueshëm, i lansuar në shkurt, mund të rritet nga 599 në 856 dollarë.
Angelo Zino, analist i kapitalit në CFRA Research, tha se Apple do ta ketë të vështirë të kalojë mbi 5% deri në 10% të kostove të rritura për konsumatorët.
“Ne presim që Apple të frenojë çdo rritje të madhe të telefonave deri në këtë vjeshtë kur iPhone 17 do të del në treg, pasi zakonisht është mënyra se si i trajton rritjet e planifikuara të çmimeve”, tha ai.
Apple shet më shumë se 220 milionë iPhone në vit – tregjet e saj më të mëdha përfshijnë SHBA, Kinën dhe Evropën.
Vitin e kaluar, blerësit në Turqi dhe Brazil iu desh të paguanin përkatësisht 3.400 dhe 2.800 dollarë për një iPhone 15 për shkak të taksave të larta të importit për pajisjet e huaja elektronike.
iPhone nuk është i vetmi që mund të ndikohet nga tarifat. Nintendo kohët e fundit vonoi fillimin e porosive paraprake të Switch 2, në mënyrë që të mund të “vlerësonte ndikimin e mundshëm të tarifave dhe kushteve në zhvillim të tregut”.
Financial Times vlerëson se Switch 2 mund të kushtojë mbi 449,99 dollarë duke pasur parasysh se është prodhuar në Vietnam dhe Kamboxhia. Kjo e fundit përballet me tarifën e re të vendosur nga Trump prej 49 për qind.
Trump më 2 prill shtoi një tarifë 34 për qind për importet nga Kina që do të hyjë në fuqi më 9 prill. Veprimi i tij ka shkaktuar reagimin e menjëhershëm të Kinës, e cila më 4 prill vendosi një kundërtarifë prej 34 për qind ndaj mallrave amerikane.
Burimi: botasot.info
