A do të ketë zgjedhje të parakohshme parlamentare së bashku me zgjedhjet lokale vitin e ardhshëm në tetor?! Kjo pyetje parashtrohet pasi që liderët e partive politike filluan me thirrje të tilla. I fundit që kërkoi një gjë të tillë ishte Ali Ahmeti në takimin me qytetarët në Bogovinë.
“Mickoski dje vetë deklaroi se në tetor të vitit të ardhshëm, sot 1 vjet të jemi në zgjedhje të parakohshme parlamentare bashkë me ato lokale. Hristijan Micksoki këtu është para prove a është burrë që i mban fjalët apo vetëm e ka thënë për të friguar opozitën maqedonase. Opozita maqedonase duhet të jetë e guximshme, sepse nuk kanë çfarë të humbin le të përgatitet mirë sot 1 vjet në fushë të mejdanit me VMRO-në, ne në fushë të mejdanit me të gjithë ata që nuk mendojnë si ne, dhe ata që nuk mendojnë si ne sot hiqen si përfaqësues të shqiptarëve në institucionet e vendit”, tha kryetari i BDI-së, Ali Ahmeti.
Duke komentuar deklaratën e Ahmetit, Mickoski sot tha se ata së pari le të përgatiten për përgjegjësi, ndërsa për zgjedhje kur të vijë koha.
“E ndjejnë edhe ata vendosmërinë e Qeverisë për luftën kundër krimit dhe korrupsionit. E dinë çfarë kanë bërë 20 vjetët e fundit, janë të vetëdijshëm dhe e dinë se ngadalë por sigurt po vjen dita kur ata do të duhet të përgjigjen. Andaj si rezultat i kësaj frike ata në mënyrë joparimore marrin guximin dhe mendojnë se në atë mënyrë do të tërheqin më shumë votues. Porosia e ime për ta është që të përgatiten për përgjegjësi, ndërsa për zgjedhje kur të vijë koha”, theksoi kryeministri Hristijan Mickoski.
Me koment u paraqit edhe Izet Mexhiti, ministër në Qeveri nga koalicioni VLEN.
Sipas Mexhitit, para se Ahmeti të caktojë mejdan, BDI do të bënte mirë t’i përgjigjet publikut në pyetjet e mëposhtme:
- çfarë oferte përmbajnë SMS porositë të cilat ia kanë dërguar Kryeministrit Mickovski në kohën kur po negociohej qeveria e re?!
- çfarë oferte vendosën në tavolinë në dhomën 161 në Parlament emisarët e Frontit Evropian derisa VLEN dhe VMRO DPMNE negocionin kabinetin e ri qeveritar?!
- a është e vërtetë se vetëm dy ministri dhe as Kryetari i Parlamentit, ishte oferta e BDI-së për VMRO-në vetëm që të jenë përsëri në Qeveri?!
TV21 kontaktoi edhe liderin e LSDM-së, Venko Filipçe. Ai nuk deshi të komentojë, por megjithatë tha se qëndrimin zyrtar do ta shpalosin të hënën në konferencë zyrtare për media.
Vetë temën për zgjedhjet e parakohshme parlamentare në tetor të vitit të ardhshëm me ato lokale, Mickoski e ngriti në foltoren e Kuvendit të enjten gjatë pyetjeve të deputetëve. Nëse doni të shkoni në zgjedhje, le të matemi, ishte përgjigjja e Mickoskit ndaj Filipçes, për thirrjet se duhet ta kthejë mandatin, sepse para se të bëhet kryeministër ka thënë se nuk do ta përdor “E Veriut” as me koston e postit të kryeministrit.
Burimi: TV21
