Agjencia për Ushqim dhe Veterinari (AUV), javën e kaluar, kreu një kontroll të jashtëzakonshëm inspektues te një person juridik – një mishtore në Komunën e Vasilevës, ku në një pronë private u zbulua një dhomë frigoriferike që nuk ishte e regjistruar në Agjencinë për Ushqim dhe Veterinari.
Gjatë kontrollit, veterinerët zyrtarë të AUV-së gjetën dhe sekuestruan në frigorifer 400 kilogramë produkte të ngrira të përgatitura nga mishi, përfshirë pleskavica dhe qebapë, si dhe 70 kilogramë organe të brendshme. E gjithë sasia e sekuestruar e produkteve të mishit dhe organeve të brendshme u asgjësua në mënyrë të sigurt në deponi, në përputhje me procedurat ligjore të përcaktuara, njoftojnë nga AUV-ja.
Për shkak të parregullsive të konstatuara, është shqiptuar masa për mbylljen e përkohshme të frigoriferit, ndërsa personit juridik i janë shqiptuar edhe gjoba për funksionimin e një objekti të paregjistruar dhe mosetiketimin e produkteve.
Ky rast është një tjetër dëshmi e rëndësisë së kontrolleve të rregullta dhe të jashtëzakonshme inspektuese, përmes të cilave AUV-ja mbikëqyr veprimtarinë e operatorëve ushqimorë, respektimin e detyrimeve ligjore dhe përmbushjen e kushteve për sigurinë e ushqimit që prodhohet, ruhet dhe vendoset në treg.
Në periudhën nga janari deri në gusht të vitit 2026, shërbimet inspektuese të AUV-së kanë kryer gjithsej 74.838 kontrolle. Kontrollet përfshijnë segmente të ndryshme të zinxhirit ushqimor në tregun vendas dhe në import, me qëllim zbulimin dhe eliminimin në kohë të parregullsive, si dhe parandalimin e vendosjes në treg të ushqimit të pasigurt.
Gjatë kësaj periudhe janë asgjësuar 69.776 kilogramë ushqim të pasigurt nga tregu vendas dhe importi. Gjithashtu, është ndaluar importi i 21.105 kilogramëve ushqim të pasigurt me origjinë jo shtazore, ndërsa në vendet e origjinës janë kthyer dërgesa me gjithsej 122.602 kilogramë ushqim me origjinë shtazore.
Agjencia për Ushqim dhe Veterinari vazhdon të kryejë kontrolle të rregullta dhe të jashtëzakonshme inspektuese në të gjithë territorin e shtetit. Prioritet mbeten mbrojtja e shëndetit të qytetarëve, parandalimi i vendosjes në treg të ushqimit të pasigurt, respektimi i dispozitave ligjore dhe mbrojtja e të drejtave të konsumatorëve, njoftojnë nga AUV-ja.
Burimi: alfax.mk
