​2 anëtarë të ekuipazhit humbën jetën pasi dy helikopterë zjarrfikës u përplasën gjatë shuarjes të një zjarri në Greqi

Dy anëtarë të ekuipazhit humbën jetën dhe dy të tjerë u shpëtuan pasi dy helikopterë zjarrfikës u përplasën në ajër teksa po “luftonin” një zjarr në pjesën perëndimore të rajonit të Atikës, të dielën, njoftuan autoritetet greke dhe transmetuesi publik ERT.

Shërbimi Zjarrfikës i Greqisë bëri të ditur se helikopterët po merrnin pjesë në operacionet për shuarjen e zjarrit në zonën e Psathas, kur u përplasën në ajër dhe u rrëzuan. Menjëherë pas aksidentit u nis një operacion kërkimi dhe shpëtimi, transmeton AA, përcjell KosovaPress.

Më vonë, autoritetet konfirmuan se të katër anëtarët e ekuipazheve ishin gjetur. Dy prej tyre u shpëtuan të gjallë, ndërsa dy të tjerët u gjetën pa shenja jete.

Sipas Shërbimit Zjarrfikës, viktimat ishin një anëtar grek dhe një danez i ekuipazhit. Të mbijetuarit janë një shtetas grek dhe një shtetas britanik.

Dy të mbijetuarit u dërguan për trajtim në Spitalin e Përgjithshëm të Forcave Ajrore 251 në Athinë.

Autoritetet thanë se helikopterët ishin avionë të tipit Bell, të marrë me qira. Secili prej tyre kishte një ekuipazh prej dy personash, të përbërë nga një pilot i huaj dhe një koordinator grek.

Piloti i njërit prej helikopterëve arriti të kontaktonte qendrën operative të Departamentit të Zjarrfikësve menjëherë pas përplasjes dhe raportoi se bashkëpiloti ishte plagosur.

Ekuipazhi i atij helikopteri u gjet me lëndime të lehta dhe ishte në gjendje të komunikonte me ekipet e shpëtimit.

Helikopterët ishin nisur nga Baza Ajrore e Elefsinës.

Shërbimi Zjarrfikës njoftoi se shkaqet dhe rrethanat e sakta të përplasjes janë ende nën hetim.