10 shoferë të arrestuar për drejtim të pakujdesshëm të automjeteve

Gjatë 24 orëve të fundit, në të gjithë territorin e vendit, zyrtarët policorë kanë privuar nga liria 10 shoferë për drejtim të pakujdesshëm të automjeteve. Tetë prej tyre kanë drejtuar automjet pa leje drejtimi, ndërsa dy kanë qenë nën ndikimin e alkoolit.

Dy persona në Prilep janë kapur duke drejtuar automjet pa patentë, ndërsa nga një person në Krivogashtan, Shkup (i mitur), Tetovë, Gjevgjeli, Dibër dhe Resnjë (i mitur) janë konstatuar duke vozitur pa leje drejtimi.

Ndërkohë, një person në Shkup dhe një tjetër në Demir Hisar kanë drejtuar automjete nën ndikimin e alkoolit.

Pas dokumentimit të plotë të rasteve, ndaj tyre do të ngrihen kallëzimet përkatëse penale.

Autoritetet apelojnë te të gjithë pjesëmarrësit në komunikacion që të respektojnë rregullat dhe dispozitat e trafikut, të mos drejtojnë automjet pa kaluar provimin për patentë shoferi, nëse kanë masë ndalimi për drejtim automjeti ose nëse janë nën ndikimin e alkoolit, në mënyrë që të kontribuohet së bashku për një komunikacion më të sigurt.