Tre zyrtarë të lartë izraelitë kanë konfirmuar për Reuters se Shtetet e Bashkuara po përgatiten për një përpjekje të re diplomatike me Iran, me synim arritjen e një marrëveshjeje që mund të çojë drejt përfundimit të përplasjeve në Lindjen e Mesme.
Sipas tyre, presidenti amerikan Donald Trump po kërkon një zgjidhje negociuese, por gjasat për sukses mbeten të ulëta, pasi Teherani vështirë se do të pranojë kushtet kryesore të Uashingtonit.
Burimet, që folën në kushte anonimiteti, theksuan se përpjekjet e mëparshme për dialog dështuan më 28 shkurt, kur shpërtheu konflikti mes SHBA-së dhe Izrael nga njëra anë dhe Iranit nga ana tjetër.
Kushtet e SHBA në tryezë
Sipas vlerësimeve, kërkesat amerikane në negociatat e mundshme do të përfshijnë kufizime të rrepta mbi programin bërthamor të Iranit, si dhe mbi zhvillimin e raketave balistike – dy çështje që përbëjnë prej kohësh pika të forta përplasjeje mes dy vendeve.
Vetë Trump deklaroi të hënën (23 mars), përmes rrjeteve sociale, se SHBA dhe Irani kanë zhvilluar bisedime “shumë të mira dhe produktive” për një “zgjidhje të plotë dhe përfundimtare” të konfliktit në rajon.
Megjithatë, pala iraniane e mohoi këtë pretendim, duke këmbëngulur se nuk ka pasur asnjë negociatë mes dy vendeve.
Nga ana e tij, kryeministri i Izrael, Benjamin Netanyahu, deklaroi se Trump beson se “arritjet e rëndësishme” të IDF dhe forcave të armatosura amerikane mund të shfrytëzohen për të arritur një marrëveshje që përmbush objektivat e luftës, duke garantuar njëkohësisht interesat jetike të sigurisë.
Burimi: botasot.info
