Zëvendëskryeministri i parë, Bekim Sali, ka marrë pjesë në një takim me Rektorin e Universitetit Ndërkombëtar Ballkanik (IBU), Prof. Dr. Lutfi Sunar, për të diskutuar mundësitë e bashkëpunimit në fushën e arsimit të lartë dhe zhvillimin e partneriteteve akademike.
Sipas njoftimit të zëvendëskryeministrit, në takim u vlerësua rëndësia e shkëmbimit të përvojave dhe realizimit të projekteve të përbashkëta që synojnë rritjen e cilësisë së arsimit dhe avancimin institucional.
“Në kuadër të bashkëpunimit ndërinstitucional në fushën e arsimit të lartë, zhvilluam një takim me Rektorin e Universitetit Ndërkombëtar Ballkanik, Prof. Dr. Lutfi Sunar,” tha Sali.
Ai shtoi se qëllimi i këtij bashkëpunimi është thellimi i partneritetit akademik dhe zhvillimi i projekteve që kontribuojnë në përmirësimin e cilësisë së mësimdhënies dhe përgatitjes profesionale të studentëve.
“Diskutuam mundësitë për realizimin e projekteve të përbashkëta në interes të zhvillimit institucional dhe rritjes së cilësisë në arsim,” u shpreh Sali, duke theksuar se institucionet e arsimit të lartë luajnë një rol kyç në përgatitjen e brezave të ardhshëm dhe zhvillimin e kapaciteteve të vendit.
Burimi: alfax.mk
