ZNAM kërcënon me largim nga Qeveria! Nëse provimi i jurisprudencës mbahet në një gjuhë tjetër përveç maqedonishtes, largohemi nga pushteti – paralajmëron Dimitrievski!

“Lëvizja ZNAM nuk do të pranojë që provimi i jurisprudencës të mbahet në një gjuhë tjetër përveç maqedonishtes. Nëse Qeveria merr një vendim ndryshe, partia është e gatshme të largohet nga koalicioni qeveritar”, deklaroi sonte lideri i partisë në pushtet, Maksim Dimitrievski, në një intervistë për televizionin “Sitel”.

Dimitrievski tha se qëndrimet e ZNAM-it për këtë çështje janë të njohura për kryeministrin Hristijan Mickoski, por shtoi se partia është e gatshme të zhvillojë bisedime brenda koalicionit qeveritar.

“Në takimin e ardhshëm me kryeministrin do të kërkoj një takim të liderëve, sepse ne asnjëherë nuk kemi diskutuar hapur për këtë çështje me partnerët tanë në Qeveri, në mënyrë që të përcaktojmë të gjitha vijat e kuqe dhe çfarë do të nënkuptojë kjo në të ardhmen për shtetin dhe për të gjithë sistemin tonë të drejtësisë”, tha kryetari i Lëvizjes ZNAM.

Sipas tij, çështja e provimit të jurisprudencës nuk është e izoluar, por prek edhe aspekte më të gjera të funksionimit të sistemit të drejtësisë dhe të rregullimit shtetëror. Ai pretendon se pas kërkesave për zgjerimin e përdorimit të gjuhës shqipe në këtë fushë qëndrojnë qëllime më të gjera politike. Në këtë kontekst, ai vlerësoi se në vend ekzistojnë forca që dëshirojnë që një ditë shteti të shndërrohet në konfederatë.

“Maqedonia është republikë, por për fat të keq në vend ekzistojnë forca që një ditë dëshirojnë ta shohin atë si konfederatë. Vazhdimisht shfaqen individë të caktuar që bëjnë thirrje për më shumë të drejta dhe bashkimin e komuniteteve lokale, por mbi baza etnike e jo territoriale. Për më tepër, pas përfundimit të zgjedhjeve lokale në Bërvenicë, doli njëri nga ish-liderët e partive shqiptare dhe tha: ‘Është koha ta shpallim Iliridën’.

Maqedonia nuk mund të jetë thjesht një formë e shtetit – republikë – nëse avancimin e të drejtave të caktuara të komuniteteve të tjera etnike, të cilat e shfrytëzojnë këtë të drejtë, e konsiderojnë si të drejtë kushtetuese që duhet ta komplikojë më tej shtetin. Kjo e thjeshton çështjen vetëm për një grup të vogël qytetarësh që janë pjesë përbërëse e shtetit, por njëkohësisht e ndërlikon edhe më shumë të gjithë procesin për të gjithë të tjerët”, tha Dimitrievski.

Kërkesat që provimi i jurisprudencës të mbahet edhe në gjuhën shqipe, të cilat sipas Dimitrievskit “po imponohen në mënyrë shumë naive në opinionin publik”, janë në kundërshtim me rekomandimet e Komisionit të Venecias të vitit 2019 për përdorimin e një gjuhe tjetër përveç maqedonishtes në sistemin e drejtësisë. Sipas tij, pasojat do të jenë të mëdha në vetë funksionimin e sistemit të drejtësisë në vend.

Edhe pse deklaroi se nuk është kundër përdorimit të gjuhëve të komuniteteve etnike joshumicë, duke përmendur Kumanovën si shembull të zbatimit të shumëgjuhësisë në punën e Këshillit të Komunës, Dimitrievski shtoi se as ai dhe as partia që drejton nuk do të lejojnë “komplikimin e mëtejshëm të shtetit”.