Flakët përfshijnë pyje të përziera në Shkup dhe në Strugë – 31 zjarre të regjistruara në vend
Gjithsej 31 zjarre në hapësira të hapura janë regjistruar deri në orën 07:30 të mëngjesit në vend, njoftoi Qendra për Menaxhim me Kriza (QMK).
Sipas të dhënave të fundit, një zjarr mbetet aktiv, tre janë nën kontroll, ndërsa 27 janë shuar.
Zjarri aktiv është në territorin e Komunës së Gjorçe Petrovit, në fshatin Graçan, por aktualisht flakët janë përqendruar në territorin e Kosovës, ku po digjet pyll.
Ndërkohë, mbrëmë vonë, QMK njoftoi se, me kërkesë të Kosovës, Maqedonia e Veriut ka angazhuar një helikopter të Ministrisë së Punëve të Brendshme për të ndihmuar në shuarjen e zjarreve në rajonin e Hanit të Elezit.
“Ky nuk është vetëm një intervenim për shuarjen e zjarrit, por edhe dëshmi e gatishmërisë sonë për t’u ndihmuar fqinjëve tanë dhe më gjerë, sa herë që kjo është më e nevojshme”, deklaroi drejtori i QMK-së, Muhamed Ali.
Tre zjarre ende nën kontroll
Autoritetet bëjnë të ditur se tre zjarre vazhdojnë të jenë nën kontroll:
* Komuna e Sarajit – fshati Kopanicë: digjet pyll i ulët dhe vegjetacion i ulët.
* Komuna e Çuçer-Sandevës – fshati Brest, lokaliteti Ramno në Shkup dhe Malin e Zi: digjet pyll i përzier.
* Komuna e Strugës – mes fshatrave Burinec dhe Lokov: digjet pyll i ulët.
Situata po monitorohet nga ekipet kompetente, ndërsa autoritetet mbeten në gatishmëri për ndërhyrje të mëtejshme.
Burimi: lajmpress.org
