Zjarr i madh në Sllovi të Lipjanit, rrezikohen shtëpitë

Një zjarr i madh ka përfshirë pasditen e sotme fshatin Sllovi të Lipjanit, duke rrezikuar banesat në zonë.

Ekipet e zjarrfikësve janë në terren dhe po punojnë për shuarjen e flakëve, si dhe për parandalimin e përhapjes së tyre në drejtim të shtëpive.

Tymi i dendur është parë nga disa kilometra larg, ndërsa autoritetet ende nuk kanë dhënë detaje mbi shkakun e zjarrit apo dëmet e mundshme.

Ndryshe, gjatë ditës së sotme, në Kosovë janë regjistruar gjithsej 23 vatra zjarri, nga të cilat 11 janë ende aktive, ndërsa 12 janë lokalizuar dhe janë nën kontroll.

Sipas raportit të fundit nga Qendrat Operative 112 dhe Qendra Operative e Agjencisë, situata po menaxhohet në mënyrë të koordinuar me Njësitë Profesionale të Zjarrfikjes dhe Shpëtimit, të cilët janë angazhuar intensivisht për të lokalizuar dhe shuar zjarret.

Agjencia ka apeluar për kujdes të shtuar nga qytetarët, duke i ftuar ata të shmangin çdo veprim që mund të shkaktojë zjarre dhe të raportojnë menjëherë çdo vatër të dyshuar në numrat emergjentë 112, 193, 192.

“Të gjithë qytetarët janë ftuar të tregojnë kujdes të shtuar dhe të ndërmarrin masa parandaluese për të shmangur shpërthimin e zjarreve. Çdo vatër zjarri duhet raportuar menjëherë në numrat 112, 193, 192”, thuhet tutje në njoftimin e tyre.