Nga java e ardhshme, orari i mësimit pritet t’u ndryshojë.
Kjo meqë në shkollën “Zenel Hajdini” në Prishtinë, do të nis zbatimi i mësimit tërëditor.
Skeptik rreth kësaj nisme janë prindërit.
“Këta thanë që prej të hënës me e bë mësim tërëditor, por nuk besoj që ka mundësi me u bë tërëditori. E para e të parës, kuzhina nuk është realizuar ende, nuk kanë qëndrim ditor fëmija prej 08:00 deri në 15:30 me qëndru në karrige, është e palogjikshme ai fëmijë ka me u deviju në bosht kurrizor”, deklaroi Baahtije Veliu-Gashi.
Por kishte edhe nga ata që besonin që procesi i mësimit tërëditor do të zhvillohet siç është më së miri, por që nuk pranuan të flasin para kamerës.
E as përfaqësuesit e prindërve të nxënësve të shkollës “Asim Vokshi”, por që ndjekin mësimin në “Zenel Hajdini”, nuk pranuan të flasin pa e parë fillimin e procesit dhe rrjedhën e tij.
Televizoni ka tentuar të marrë një qëndrim edhe nga drejtoresha e shkollës “Zenel Hajdini”, Mirvete Tahiri për të mësuar rreth përgatitjeve që janë bërë, por e njëjta nuk ishte e qasshme.
Në anën tjetër, detaje dha drejtori i Arsimit në Prishtinë, Samir Shahini.
“Ne jemi në përgatitjet finale që mësimi tërëditor të fillojmë nga java që vjen në shkollën ‘Zenel Hajdini’, ashtu siç është premtuar, përkundër faktit që nuk arritëm të ndërtojmë aneksin e kuzhinës në formën më të mirë të mundshme në shërbim të ushqimit për mësim tërëditor. Përgatitjet tona kanë pasur një opsion B që nënkupton shërbimi i ushqimit në boxa një përdorimshe për nxënës me të cilën me kuzhinën e kryeqytetit jemi në finalizim të marrëveshjes për të filluar një shërbim të tillë nga java që vjen”, deklaroi drejtori i Arsimit në Prishtinë, Samir Shahini.
Sipas Shahinit, gjithë kjo vonesë erdhi si pasojë e bllokimit të buxhetit të kryeqytetit.
Televizoni nuk ka pasur leje të hyjë brenda shkollës për të parë nga afër përgatitjet për këtë proces të mësimit tërëditor.
Burimi: botasot.info
