Albulena Haxhiu ka reaguar pasi ka marrë zyrtarisht detyrën e ushtrueses së detyrës së Presidentes së Republikës së Kosovës, duke theksuar se kjo përgjegjësi do të ushtrohet me përkushtim dhe në përputhje me Kushtetutën.
Ajo ka bërë të ditur se mekanizmat kushtetues sigurojnë vazhdimësi dhe stabilitet institucional, ndërsa ka garantuar funksionimin e pandërprerë të institucioneve deri në zgjedhjen e presidentit të ri.
Haxhiu shtoi se Kuvendi i Kosovës do të ndjekë procedurat kushtetuese për zgjedhjen e kreut të ri të shtetit brenda afateve të përcaktuara.
Postimi i Haxhiut:
Sot kam marrë detyrën e Ushtrueses së Detyrës së Presidentes së Republikës së Kosovës.
Mekanizmat kushtetues që kemi ndërtuar garantojnë vazhdimësi e stabilitet institucional.
Këtë përgjegjësi do ta ushtroj me përkushtim të plotë, duke garantuar funksionim të pandërprerë të institucioneve dhe respektim të rendit kushtetues.
Kuvendi i Republikës së Kosovës do të vijojë procedurën kushtetuese për zgjedhjen e Presidentit të ri brenda afateve kushtetuese. Deri në përmbylljen e këtij procesi, do ta ushtroj këtë detyrë në respekt të plotë të Kushtetutës, ligjit dhe interesit publik.
Falënderoj Presidenten Vjosa Osmani Sadriu për shërbimin e saj ndaj vendit dhe i uroj suksese në vazhdim.
Burimi: botasot.info
