Aktorja Zendaya ka tërhequr vëmendjen në një shfaqje speciale të filmit “The Odyssey” në Los Angeles, ku u paraqit me një fustan elegant krem, të dekoruar me detaje të veçanta.
Por përtej paraqitjes së saj, ajo foli edhe për vështirësitë emocionale që kishte përjetuar gjatë xhirimeve të filmit të regjisorit Christopher Nolan, ku interpreton perëndeshën Athena.
Zendaya tregoi se kishte qenë shumë nervoze dhe në ankth gjatë realizimit të një skene të veçantë, ku merrnin pjesë një numër i madh aktorësh shtesë dhe interpretues të skenave aksion.
Ajo zbuloi se bashkëshorti i saj, Tom Holland, i cili në film luan rolin e Telemakut, kishte ardhur në sheshxhirim pikërisht atë ditë për ta inkurajuar.
“U ndjeva e mbingarkuar, për ta thënë më së paku”, u shpreh aktorja gjatë aktivitetit të mbajtur në Muzeun e Akademisë në Los Angeles.
Ajo kujtoi se xhirimet zhvilloheshin gjatë natës dhe se, kur mbërriti në sheshxhirim, e kuptoi se po përjetonte një moment të jashtëzakonshëm.
“Jam në sheshxhirim, përballë njerëzve që i kam admiruar, por vazhdimisht mendoja: nuk dua ta prish këtë”, tregoi Zendaya.
Aktorja shpjegoi se përmasat e një produksioni të tillë janë të vështira për t’u kuptuar derisa të jesh vetë pjesë e tij. Ajo theksoi se ndihej nën presion për të dhënë më të mirën, sidomos duke parë përkushtimin e aktorëve të tjerë dhe interpretuesve të skenave të rrezikshme.
“U ndjeva jashtëzakonisht nervoze. Ndoshta kjo ishte e dobishme për skenën, por kishte edhe shumë aktorë në sfond dhe interpretues të skenave aksion që po jepnin performanca të mrekullueshme. Nuk doja të isha unë ajo që do ta prishte atë xhirim, veçanërisht kur filmonim me kamera IMAX”, rrëfeu ajo.
Mbështetja e Tom Hollandit në atë ditë duket se kishte rëndësi të veçantë për Zendayan, e cila po përballej me presionin e një prej produksioneve më të mëdha kinematografike në të cilat ka marrë pjesë.
Burimi: botasot.info
