Presidenti ukrainas Volodymyr Zelensky ka bërë të ditur se është forcuar mbrojtja ajrore e vendit me sisteme të reja Patriot, falë mbështetjes gjermane.
“Ne kemi forcuar komponentin ‘Patriot’ të mbrojtjes sonë ajrore. Falënderoj Gjermaninë dhe personalisht kancelarin Friedrich Merz për këtë hap të përbashkët për të mbrojtur jetën njerëzore nga terrori rus,” shkroi Zelensky në platformën X.
Ndërkohë, tensionet në front mbeten të larta. Sipas agjencisë Ukrinform, Rusia ka sulmuar me dronë një parking kamionësh transporti në rajonin e Odesës, ku si pasojë dy persona kanë humbur jetën dhe një tjetër është plagosur, sipas njoftimit të Shërbimit Shtetëror të Emergjencave të Ukrainës.
Në anën tjetër, zëdhënësi i Kremlinit, Dmitrij Peskov, ka deklaruar për agjencinë ruse TASS se një takim urgjent midis Vladimir Putin dhe Donald Trump është “i mundur”, por aktualisht “nuk ka nevojë për të”.
“Së pari është i domosdoshëm një punim shumë i kujdesshëm mbi çështjet që lidhen me marrëveshjen për Ukrainën, jo një samit,” theksoi Peskov, duke nënvizuar se prioritet mbetet puna diplomatike, jo takimet e nivelit të lartë.
Burimi: botasot.info
