Një zbulim i pazakontë është raportuar në shtetin Michoacan të Meksikës, ku një grup vullnetarësh që kërkon persona të zhdukur pretendon se ka gjetur rreth 1600 dhëmbë qumështi në një zonë të dyshuar si varr masiv.
Grupi, i përbërë nga familjarë të personave të zhdukur dhe i themeluar nga ish-deputetja Margarita Lopez, kërkon që dhëmbët t’i nënshtrohen analizave ADN-je për të përcaktuar nëse mund të lidhen me persona të zhdukur.
Sipas Lopez, kërkimet në zonën e Zacapu kanë nisur që në vitin 2021, ndërsa gjatë viteve janë gjetur edhe fragmente kockash që dyshohet se janë njerëzore. Grupi pretendon se zbulimi i fundit përfshin grupe dhëmbësh qumështi.
Lopez ka ngritur dyshime se dhëmbët mund t’u përkasin fëmijëve dhe ka përmendur mundësinë e viktimave të trafikimit të organeve ose shfrytëzimit seksual. Megjithatë, këto janë pretendime që nuk janë konfirmuar nga analizat mjekoligjore dhe deri tani nuk ka një lidhje të përcaktuar mes dhëmbëve dhe viktimave konkrete.
Prokuroria e shtetit Michoacan ka mohuar se ka marrë që nga viti 2021 ndonjë denoncim apo kërkesë për ndërhyrje mjekoligjore lidhur me këtë çështje.
Nga ana tjetër, Lopez e kundërshton këtë version dhe pretendon se gjatë nxjerrjes së dhëmbëve kanë qenë të pranishëm punonjës të prokurorisë dhe specialistë të mjekësisë ligjore.
Për momentin, origjina e dhëmbëve dhe identiteti i personave të cilëve mund t’u përkasin mbeten të paqarta. Verifikimi përfundimtar pritet të bëhet përmes analizave forenzike dhe gjenetike.
Burimi: botasot.info
