Partia VLEN ka reaguar pas shfuqizimit të aktgjykimit të Apelit për rastin e tragjedisë së Llaskarcës, duke kërkuar që procedura gjyqësore të mos zvarritet më tej dhe që lënda të trajtohet me përparësi.
Nga VLEN-i thonë se shtatë vjet pas tragjedisë, familjet e 16 viktimave ende presin drejtësi, ndërsa kthimi i lëndës për rivendosje, sipas tyre, krijon rrezikun që procesi të zgjatet edhe më shumë.
“Shtatë vjet pas tragjedisë në Llaskarcë, familjet e 16 viktimave ende presin drejtësi. Shfuqizimi i aktgjykimit të Apelit dhe kthimi i lëndës për rivendosje hapin përsëri mundësinë që ky proces të zvarritet pa fund”, thuhet në reagimin e VLEN-it.
Sipas kësaj partie, rasti “Durmo Turs”, së bashku me raste të tjera, është dëshmi e problemeve të sistemit gjyqësor. Nga VLEN-i pretendojnë se edhe më herët kanë paralajmëruar për zvarritjen e proceseve dhe për probleme në trajtimin e lëndëve.
“Edhe në dhjetor paralajmëruam se ‘Durmo Turs’, bashkë me shumë raste të tjera, është dëshmi e gjallë e dështimit të sistemit. Pamë shtyrje të dyshimta, raporte mjekësore dhe moszbatim të vendimeve”, thuhet në reagim.
VLEN-i ka kritikuar edhe mënyrën e trajtimit të superekspertizës për rastin e Llaskarcës, duke e lidhur këtë me rënien e besimit të qytetarëve në sistemin gjyqësor.
“Besimi në gjyqësor, që ka rënë deri në dy për qind, nuk ra nga qielli. Vetëm superekspertiza për rastin e Llaskarcës qëndroi 315 ditë në Byronë për ekspertiza gjyqësore. Në krye të Byrosë ishte Valdet Xhaferi, funksionar i BDI-së. Pra, lënda nuk u zvarrit vetë”, deklaron VLEN-i.
Partia kërkon reforma të thella në sistemin e drejtësisë dhe vlerëson se ministri i ri i Drejtësisë ka nisur, sipas tyre, procesin e reformimit të sistemit.
“Gjyqësori duhet reformuar nga rrënjët dhe ministri i ri i Drejtësisë e ka nisur mbarë këtë punë, me vendosmërinë që raste si Llaskarca të mos mbeten më peng i sistemit”, thuhet në reagim.
VLEN-i kërkon që arsyetimi i vendimit të publikohet sa më shpejt dhe që lënda të trajtohet me përparësi, pa vonesa të reja procedurale.
“Kërkojmë publikimin e shpejtë të arsyetimit dhe trajtimin me përparësi të lëndës, pa lojëra të reja procedurale. Familjet e viktimave nuk duhet të kthehen përsëri në pikën zero”, përfundon reagimi i VLEN-it.
Burimi: alfax.mk
