Vazhdohet paraburgimi për Veselin, Selimin dhe Krasniqin, thuhet se mund të pengojnë procesin e kryejnë krime tjera

Gjykata Speciale e njohur si Dhomat e Specializuara të Kosovës (DhSK) në Hagë ka njoftuar se ka vazhduar paraburgimin ndaj tre të akuzuarve, Kadri Veseli, Rexhep Selimit dhe Jakup Krasniqit.

Sipas Gjykatës, të akuzuarit nëse lihen të lirë mund ta pengojnë procesin ose të kryejnë krime tjera, raporton “Betimi për Drejtësi”.

Trupi Gjykues në rastin Thaçi dhe të tjerët vendimin e fundit e kishte marrë më 16 janar kur ishte paraparë rishikimi i vendimit për paraburgimin të ish-udhëheqësve të UÇK-së.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.  

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.