Aktorja e njohur Denise Richards ka zbuluar se së fundmi i është nënshtruar një ndërhyrjeje kirurgjikale estetike për fytyrën, me qëllim rikthimin e pamjes së saj të mëparshme.
Në një intervistë për Allure, 55-vjeçarja ndau detaje nga përvoja e saj me procedurat kozmetike, duke treguar se operacioni është kryer rreth tetë muaj më parë. Ajo madje publikoi edhe foto nga ndërhyrja, duke qenë transparente me publikun.
Richards rrëfeu se ishte e tronditur kur lajmi për ndërhyrjen e saj u bë publik nga ish-bashkëshorti i saj, Aaron Phypers, përpara se ajo vetë të ishte gati të fliste. “Doja t’i ktheja gjërat siç ishin më parë. Isha e tmerruar”, u shpreh ajo, duke shtuar se si person publik prej moshës 20-vjeçare, ndryshimet në pamje janë të vështira për t’u fshehur.
Aktorja theksoi se kjo është hera e parë që i nënshtrohet një operacioni në fytyrë, megjithëse më parë ka kryer ndërhyrje të tjera estetike, përfshirë zmadhimin e gjoksit në moshën 19-vjeçare dhe një operacion korrigjues për implantet.
“Është natë me ditë”, tha ajo për ndryshimin para dhe pas ndërhyrjes, duke e përshkruar rezultatin si “vërtet tronditës”.
Pas operacionit, Richards zbuloi se edhe figura të tjera publike janë ndjerë më të hapura për të diskutuar përvojat e tyre me ndërhyrjet estetike, megjithëse ajo zgjodhi të mos përmendë emra. Ajo theksoi se është e rëndësishme që publiku të kuptojë se pamja rinore nuk vjen vetëm nga produkte kozmetike apo trajtime jo-invazive.
Teksa kujtoi edhe periudhën e divorcit, Richards tregoi se ish-partneri i saj kishte përhapur pretendime se ndërhyrja kishte dështuar, gjë që ajo e cilësoi si “qesharake”.
Në fund, aktorja pranoi se kishte hezituar të fliste publikisht për këtë çështje, por rrethanat e shtynë ta bënte këtë më herët nga sa kishte planifikuar.
Burimi: botasot.info
