Ish-banorja e “Big Brother VIP Kosova”, Alba Pollozhani, ka rikthyer vëmendjen e publikut pas një deklarate të bërë gjatë një Prime-i, pak para largimit të saj nga gara. Në atë moment, ajo zbuloi se kishte menduar seriozisht të vendoste shaminë, si pjesë e bindjeve të saj fetare, një pohim që u komentua gjerësisht në rrjet.
Pas reagimeve të shumta, Alba ka vendosur të sqarojë më qartë qëndrimin e saj përmes një postimi në InstaStory, ku ka ndarë me ndjekësit procesin personal dhe shpirtëror që po kalon.
Ajo thekson se ky vendim nuk ka lidhje me presionin e jashtëm apo me momentin televiziv, por buron nga bindjet e saj të hershme. Sipas saj, feja ka qenë gjithmonë pjesë e jetës, pasi është rritur në një familje besimtare, dhe dëshira për të vendosur shaminë ka lindur si një ndjenjë e brendshme gjatë qëndrimit në shtëpinë e BBVK.
Alba e cilëson këtë si një “nijet” të pastër, duke shtuar se vendime të tilla kërkojnë kohë, reflektim dhe përgatitje. Për këtë arsye, ajo nuk ka dashur të nxitohet apo të marrë një vendim vetëm për efekt publik, por ka zgjedhur të konsultohet me persona të ditur të fesë.
Sipas këshillave që ka marrë, ajo po e sheh këtë rrugëtim si një proces gradual, ku përgatitja shpirtërore është po aq e rëndësishme sa edhe ndryshimi i jashtëm.
Në mesazhin e saj, Alba nënvizon se mbulesa nuk është thjesht një element i jashtëm, por një përgjegjësi e madhe që lidhet me sjelljen, durimin dhe përkushtimin në përditshmëri.
Me këtë reagim, ish-banorja duket se ka dashur të sqarojë çdo keqkuptim, duke theksuar se deklarata e saj ishte e sinqertë dhe se ky është një vendim që po e trajton me seriozitet dhe maturi.
Burimi: botasot.info
