Tragjedia në Florida: 20-vjeçarja bashkëpilote mes nëntë viktimave të avionit që ra si raketë mbi rrugë

Një bashkëpilote 20-vjeçare është identifikuar si njëra nga nëntë viktimat e avionit privat që u rrëzua të dielën në Palm Beach County të Floridës. Avioni shpërtheu në flakë në mes të një rruge në një lagje banimi.

Nathalia Filgueiras e kishte marrë licencën e pilotit kur ishte vetëm 17 vjeçe. Sipas medieve amerikane, ajo ishte njëra nga dy anëtarët e ekuipazhit të avionit Learjet 60. Avioni po fluturonte nga Austini i Teksasit drejt ishullit Eleuthera në Bahamas.

Fatkeqësia ndodhi rreth orës 12:50 me orën lokale. Avioni ra pranë kryqëzimit të rrugës Military Trail me 10th Avenue North, në zonën Greenacres–Cresthaven. Vendi ndodhet vetëm pak kilometra larg rezidencës Mar-a-Lago të presidentit Donald Trump. Të nëntë personat në bord humbën jetën. Një burrë që ndodhej në një veturë afër vendit të ngjarjes pësoi lëndime në këmbë.

“Na mbaroi koha”

Sipas Bordit Kombëtar të Sigurisë në Transport (NTSB), ekuipazhi i njoftoi kontrollorët e trafikut ajror se po hasnin akull dhe turbulencë të moderuar. Pilotët kërkuan leje për t’u ngjitur në lartësinë 37 mijë këmbë. Më pak se 30 sekonda më vonë, avioni nisi të zbriste me shpejtësi dhe ekuipazhi lëshoi thirrjen e emergjencës “mayday”.

Në regjistrimet e komunikimit me kullën e kontrollit dëgjohet një anëtar i ekuipazhit duke bërtitur se avioni kishte tejkaluar shpejtësinë e lejuar dhe po binte me 20 mijë këmbë në minutë. Pastaj ai paralajmëroi se do të përplaseshin në tokë. Rreth 35 sekonda pas thirrjes së parë të emergjencës, nga kabina u dëgjuan fjalët e fundit: “Na mbaroi koha.”

Anëtari i NTSB-së, Tom Chapman, tha se pas kësaj transmetimi u bë i pakuptueshëm. Ai shtoi se fatkeqësisht të gjithë ata që ishin në bord humbën jetën.

Ëndrra e fluturimit

Nëna e Nathalias, Camila Corteleti, konfirmoi për mediet amerikane se e bija kishte humbur jetën në fatkeqësi. Ajo i tha gazetës New York Times se vajzës i pëlqente liria që i jepte fluturimi dhe pamja e botës nga lart.

Në një intervistë të vitit 2023 për një televizion lokal, Nathalia ishte shprehur krenare që kishte marrë licencën e pilotit ndërsa ishte ende në shkollë të mesme. Ajo kishte treguar me humor se shumë njerëz e shihnin të çuditshme që ajo mund të fluturonte me aeroplan, por ende nuk ngiste veturë.

Tetë personat e tjerë në bord ende nuk janë identifikuar.

“Si një raketë që bie nga qielli”

Pamjet e publikuara në rrjetet sociale tregojnë avionin duke rënë pothuajse vertikalisht dhe një shpërthim të fuqishëm. Guvernatori i Floridës, Ron DeSantis, e krahasoi skenën me një raketë që bie nga qielli. Sekretari amerikan i Transportit, Sean Duffy, e quajti ngjarjen një tragjedi të tmerrshme.

Mbetjet e avionit u shpërndanë nëpër fusha sportive, biznese dhe shtëpi të zonës. Sipas zyrtarëve, kjo mund të jetë shenjë se avioni u shpërbë në ajër para se të binte në tokë. Në vendin e përplasjes ka mbetur një krater i madh në mes të rrugës me gjashtë korsi. Rreth 600 banorë të një komuniteti aty pranë u evakuuan. Autoritetet lokale paralajmërojnë se rruga mund të mbetet e mbyllur një muaj ose më shumë.

Hetim i gjatë

NTSB do të hetojë sa ndikuan akulli dhe turbulenca në rrëzim dhe nëse pati edhe gabim njerëzor. Në kohën e ngjarjes në zonë ishin raportuar stuhi me bubullima. Hetuesit po përpiqen gjithashtu të zbulojnë nëse avioni kishte regjistrues të zërit në kabinë dhe nëse ai mund të gjendet.

Në hetim marrin pjesë edhe Administrata Federale e Aviacionit (FAA), përfaqësues të prodhuesit Learjet, meteorologë dhe ekspertë të kontrollit të trafikut ajror. Sipas NTSB-së, përcaktimi i shkakut të mundshëm të fatkeqësisë do të jetë një proces i gjatë.

Presidenti Trump ndodhej të dielën në mëngjes në Mar-a-Lago. Ai u largua me avionin presidencial Air Force One nga një aeroport aty pranë rreth një orë para rrëzimit.