Sulmuesi gjerman do të kthehet në fushë më shpejt se sa pritej

Niklas Fulkryg theu gishtin e këmbës në ndeshjen e tij të parë si titullar me Milanin në Serie A, të dielën kundër Fiorentinës.

Gjendja e tij shëndetësore duket se është më pak serioze nga sa pritej.

“Një thyerje e gishtit të këmbës” është diagnoza zyrtare për dëmtimin e gjermanit dhe sipas vlerësimeve të fundit, ai pritet të qëndrojë jashtë fushave për dhjetë ditë ose më shumë, duke i dhënë fund frikës fillestare për një pushim që spekulohej se do të zgjaste edhe më shumë se 30 ditë.

Fulkryg mund të kthehet në javën midis ndeshjeve kundër Bolonjës dhe Romës.

Mungesa e tij është praktikisht e sigurt për dy ndeshjet e ardhshme të kuqezinjve, ndeshjen e vështirë kundër Komos surprizuese të Çesk Fabregas dhe ndeshjen kundër Leçes së Di Françeskos, të etur për pikë dhe për të shmangur rënien nga kategoria.